מִזְמ֥וֹר לְדָוִ֑ד - תְּהִלִּ֝ים א׳

אַשְׁרֵי הָאִישׁ אֲשֶׁר לֹא הָלַךְ בַּעֲצַת רְשָׁעִים וּבְדֶרֶךְ חַטָּאִים לֹא עָמָד וּבְמוֹשַׁב לֵצִים לֹא יָשָׁב׃

כִּי אִם בְּתוֹרַת יְהוָה חֶפְצוֹ וּבְתוֹרָתוֹ יֶהְגֶּה יוֹמָם וָלָיְלָה׃

וְהָיָה כָּעֵץ׀ שָׁתוּל עַל־פַּלְגֵי־מָיִם אֲשֶׁר־פִּרְיוֹ יִתֵּן בְּעִתּוֹ וְעָלֵהוּ לֹא־יִבּוֹל וְכֹל אֲשֶׁר־יַעֲשֶׂה יַצְלִיחַ׃

לֹא־כֵן הָרְשָׁעִים כִּי אִם־כַּמּוֹץ אֲשֶׁר־תִּדְּפֶנּוּ רוּחַ׃

עַל־כֵּן לֹא־יִקָּמוּ־רְשָׁעִים בַּמִּשְׁפָּט וְחַטָּאִים בַּעֲדַת־צַדִּיקִים׃

כִּי־יָדַע יְהוָה דֶּרֶךְ צַדִּיקִים וְדֶרֶךְ רְשָׁעִים תֹּאבֵד׃